پانی پینے کی ویڈیو کے بارے میں میری رائے

ایک ویڈیو گردش کر رہی ہے ، جس میں ایک سائنس دان نے پانی پینے کا ایک انوکھا طریقہ لوگوں کو بتاکر ، اس کی نسبت حضور نبی کریم صلی اللہ علیہ وسلم کی طرف کی ہے ، اور اس کو پینے کا مسنون طریقہ بتایا ہے ، بہت سوں نے اس کی تحقیق طلب کی ہے ، تو عرض ہے کہ :

اس ویڈیو میں سنت کے حوالے سے موصوف سائنس دان نے مندرجہ ذیل باتیں ذکر کی ہیں :

1- سیدھے ہاتھ سے پینا

2- بیٹھ کر پینا

3- بسم اللہ پڑھنا

4- تین سانس میں پینا

5- برتن میں سانس نہ لینا

آخر الذکر سنت پر انہوں نے عرض کیا کہ : حضرت نبی کریم صلی اللہ علیہ وسلم نے پینے کے برتن میں سانس لینے سے منع فرمایا ، اس کا معنی ہے کے سانس روک کر پیا جائے ، مگر کیا ہم میں سے کسی نے یہ جاننے کی کوشش کی کہ پانی پینے کے دوران سانس کیسے روکا جاتا ہے ؟

ہم میں سے کوئی سانس نہیں روکتا ، اس لئے بیمار ہیں ۔

پھر کہا : ابھی دیکھیے میں پانی کو کیسے پیتا ہوں ، میں پانی کو تین سانس میں پیوں گا ۔

پھر عملی طریقہ سمجھانے کے لئے انہوں نے گلاس منھ سے لگاکر پینا شروع کیا ، تقریبا 25 سیکنڈ تک سانس روکے ہوئے ایک مقدار پیتے رہے ، یہاں تک کہ سانس چڑھ گیا ، اس پر تبصرہ کرتے ہوئے کہا کہ :

جس بندے کو پانی پیتی وقت سانس چڑھنا شروع ہوگیا اس کو زندگی میں کبھی سانس نہیں چڑھے گا ، اس کو کبھی دمہ نہیں ہوگا ، اس کو کبھی جوڑوں کا درد نہیں ہوسکتا ، اور وہ کبھی موٹا رہ ہی نہیں سکتا ۔

یہ چار فائدے گنواکر چند اہل حدیث علماء کا اس طریقہ پر اشکال ذکر کیا کہ : انہوں نے کہا کہ آپ اس کو سنت طریقہ کیسے کہہ سکتے ہیں ؟ تو میں نے پانی ان کی طرف بڑھاتے ہوئے کہا کہ : پھر آپ مجھے پی کر دکھاؤ کہ بیٹا یہ ہے سنت طریقہ ۔

پھر کہا کہ میرا کہنا ہے کہ : یہ طریقہ بتانے والا میں پہلا بندہ ہوں ، میں نے پانی سکون کے ساتھ صبر کے ساتھ پیا ... الخ

بہر حال انہوں نے سنت طریقہ کی مذکورہ بالا پانچ باتیں جو بتائیں وہ سب صحیح ہیں ، مگر چھٹی  بات  : پیتے وقت سانس چڑھنے کو جو سنت طریقہ بتایا وہ کسی روایت سے ثابت نہیں ہے ، نہ آج تک کسی نے اس کو مسنون قرار دیا ، نہ سننے میں آیا نہ کہیں نظر سے گزرا ۔

جی ہاں ، بعض روایات میں پانی کو چوس کر ( چسکی لے کر ) پینے کی تعلیم دی گئی ہے ، مگر اس میں سانس چڑھنے تک پینے کی بات نہیں ہے ۔

ایک اور بات ہے کہ : چوس چوس کر ( چسکی لے کر ) پانی پینے کی ایک بھی روایت حدیث شریف کی مشہور نو کتابوں میں نہیں ہے ( کتب ستہ ، موطا مالک ، مسند احمد ، دارمی ) ۔

جو روایات دیگر بعض کتابوں میں ہیں وہ سندا ضعیف ہیں ، ہاں بعض علماء بمجموع الطرق تحسین کے قائل ہیں ، مگر یہ بات اگر سنتِ ثابتہ ہوتی جیساکہ اس ویڈیو میں اس کا تاثر دیا گیا ، تو مشہور کتبِ حدیث سے فوت نہیں ہوتی ۔

تو جب ( مصّ الماء ) کی روایات قوی نہیں ہیں ، تو ( سانس چڑھنے کی سنیت ) کو کیسے مستند قرار دے سکتے ہیں ؟ یہ ممکن نہیں ہے ۔

تو خلاصہ یہ ہے کہ : طب یا سائنس کے لحاظ سے پانی پینے کے دوران سانس چڑھنے کے فوائد اگر پائے جاتے ہوں ، تو ان سے انکار نہیں ہے ، اسی طرح  ویڈیو میں  بتائے  ہوئےطریقے  کے مطابق  پینے کو  اگر  کوئی  اپنے  لئےمفید  سمجھتا   ہو،  تب بھی کوئی  اشکال نہیں  ہے ، مگر اس کو مسنون طریقہ بتانے کے لئے دلیل  درکار ہے ، جو دستیاب نہیں ہے ، یعنی کسی بات کا صحت کے لئے مفید ہونا اس کی سنیت ثابت کرنے کے لئے کافی نہیں ہے ، سنت تو سند وروایت سے ثابت ہوتی ہے ۔

وکتبہ العاجز محمد طلحہ بلال احمد منیار 
( ابو معاذ المکی )