كيا اذان کے دوران باتیں کرنا موت کے وقت کلمہ پڑھنے سے محروم كرتا ہے

سوال:  یہ حدیث کہاں تک صحیح ہے کہ : 

جو شخص اذان کے دوران باتیں کرتا ہے ، تو وہ موت کے وقت کلمہ پڑھنے سے محروم رہتا ہے ؟

جواب :  حمد وصلاہ کے بعد یہ گذارش ہے کہ : یہ بات بالکل بے اصل ہے ، اور اس طرح کی باتوں کی نسبت بھی حضور نبی کریم صلی اللہ علیہ وسلم کی طرف جائز نہیں ہے ، کیونکہ سراسر جہوٹ ہے ۔ ویسے اذان کے دوران بات چیت کرنے میں کوئی حرج نہیں ہے ، جائز ہے ، تاہم باتیں کرنا اگر مؤذن کی متابعت اور اذان کے جواب دینے سے مشغول کردے ، تو خاموش ہوکر اذان کا جواب دینا جو مسنون ہے ، یہ زیادہ بہتر ہے ۔

امام مالکؒ نے ( موطا ) میں بروایت ابن شھاب ، حضرت ثعلبہ بن ابی مالک رضی اللہ عنہ کی حدیث نقل کی ہے ، فرماتے ہیں کہ : حضرت عمر فاروق رضی اللہ عنہ کے زمانہ خلافت میں ، جمعہ کے دن حضرت عمر رضی اللہ عنہ کے خطبہ کے لئے باہر تشریف لانے سے پہلے ہم لوگ نوافل پڑھتے تھے ، پھر جب حضرت عمرؓ ممبر پر تشریف فرماتے ، اور مؤذن اذان دیتا تو ثعلبہ کہتے ہیں کہ : ہم بیٹھ کر باتیں کرتے ، جب مؤذن اذان سے فارغ ہوجاتا اور خطبہ شروع ہوتا تو ہم خاموش ہوجاتے ، پھر کوئی بات نہ کرتا ۔ ابن شہاب کہتے ہیں : امام کا باہر آنا ہی گفتگو کو ختم کر دیتا ہے ۔

تو مذکورہ روایت سے معلوم ہوا کہ صحابہ تابعین خیر القرون میں ، حضرت عمر فاروق رضی اللہ عنہ کی موجودگی میں اذان کے دوران باتیں کرتے تھے ، جو واضح حجت ہے اس کے جواز پر دلالت کرنے میں ۔

مسلم شریف میں حضرت انس بن مالک ؓ سے روایت ہے کہ : رسول اللہ ﷺ طلوع فجر کے وقت دشمنوں پر حملہ کرتے تھے ، اور کان لگا کر اذان سنتے ، اگر آپ ﷺ اذان سنتے تو حملہ کرنے سے رک جاتے ورنہ حملہ کر دیتے ،  ایک مرتبہ آپ ﷺ نے ایک شخص کو ( اَللَّهُ أَکْبَرُ اَللَّهُ أَکْبَرُ ) کہتے سنا تو رسول اللہ ﷺ نے فرمایا : یہ مسلمان ہے ، پھر اس نے ( أَشْهَدُ أَنْ لَا إِلَهَ إِلَّا اللَّهُ أَشْهَدُ أَنْ لَا إِلَهَ إِلَّا اللَّه ُ) کہا تو رسول اللہ ﷺ نے فرمایا : وہ جہنم سے آزاد ہوگیا ، اس کے بعد جب لوگوں نے دیکھا تو وہ بکریوں کا چرواہا تھا ۔

 اس روایت میں خود نبی کریم صلی اللہ علیہ وسلم کا اذان کے وقت بات کرنا ثابت ہے ۔ 

      تو واضح ہوگیا کہ اذان کے سننے والے کے لئے اذان کے دوران بات چیت کرنا جائز ہے، رہا مسئلہ خود مؤذن کا باتیں کرنا ، تو اس سلسلہ میں بعض اہل علم کراہت کے قائل ہیں ، اور بعض بلا کراہت جائز کہتے ہیں ، لیکن مؤذن کی بات چیت کرنا اگر طویل ہوجائے یہاں تک پے در پے اذان دینے کے خلاف ہوجائے ، تو اذان از سر نو دینا ضروری ہے ۔

مذہب حنبلی کی کتاب ( المغنی ) میں ہے : مؤذن کے لئے اذان کے دوران باتیں کرنا مناسب نہیں ہے ، بعض علماء کے نزدیک مکروہ ہے ۔ امام اوزاعی فرماتے ہیں کہ : مجھے معلوم نہیں کہ کوئی معتبر عالم نے ایسا کیا ہو ۔ تاہم حسن بصری، عطاء، قتادہ اور سلیمان بن صرد جواز کے قائل ہیں ، بشرطیکہ مختصر بات کی ہو ، مگر جب بات طویل ہوکر موالات میں خلل ڈالے جو اذان کی شرط ہے ، تو اذان باطل ہوگی ، چونکہ معلوم ہی نہیں ہوگا کہ اس نے اذان دی ۔

امام احمد سے دریافت کیا گیا کہ ایک شخص اذان دیتے ہوئے بات کرتاہے ؟ کہا : ہاں ، پھر دریافت کیا گیا کہ اگر اقامت دیتے ہوئے بات کرے ؟ تو جواب دیا : نہیں۔

واللہ اعلم